PLANFIKIMI Është një thënie e vjetër: “Njerëzit nuk planifikojnë për të dështuar por shumë njerëz dështojnë për të planifikuar”. Ja disa parime të rëndësishme të cilat ju ndihmojnë që të planifikoni ditën tuaj: Planifiko ditën vijuese, një natë përpara. Duhet ndarë pak kohë natën për planifikimin e ditës së ardhme. Njeriu në atë kohë ka më pak presion sesa gjatë ditës. Përparësia e kësaj është se njeriu shtrihet për të fjetur me ndjenjën se e ka të planifikuar, pra “nën kontroll” ditën vijuese. Shkruaje planin. Lapsi ka një fuqi të jashtëzakonshme. Të shkruarit e planit na ndihmon që të fuqizojmë ndjenjën e kontrollit tek ne. Kur ne shënojmë gjithçka që na bie ndërmend, gjërat radhiten më mirë në mendjet tona dhe presin për tu realizuar. Planifiko më tepër sesa mund të kryesh. Është një thënie: “Nëse dëshiron të përfundosh diçka jepja atë personit të zënë”. Sa më tepër që planifikoni të bëni aq më tepër do të kryeni realisht. Nëse e keni vetëm një punë për ta përfunduar gjatë ditës ajo do t’ju marr tërë ditën. Nëse keni më shumë punë për të kryer gjatë ditës është e mundur që të mos i përfundoni të gjitha por me gjasë do ti përfundoni shumicën. Shikoni, kur kemi shumë për të bërë zgjohet në ne një ndjenjë presioni pozitiv dhe ne automatikisht e menaxhojmë më mirë kohën. Cakto prioritetet. Gati gjithmonë lista jonë do të përfshijë gjëra të domosdoshme dhe jo të domosdoshme. Disa punë janë më të rëndësishme se të tjerat. Nëse nuk caktojmë prioritete ne jemi të prirë të anojmë kah kryerja e punëve jo të domosdoshme sepse ato zakonisht kryhen më lehtë, marrin më pak kohë, ose ndoshta edhe mund të jenë më tërheqëse se punët e domosdoshme. Një listë e thjesht me numër rendor sipas prioritetit do të na mjaftoj. Vendos nën numrin 1. detyrën më të rëndësishme, nën 2. atë me më pak rëndësi e kështu me radhë, deri sa detyrat të jenë të radhitura sipas rëndësisë që kanë.