FILLIMI I BIZNESIT Ju mund të keni motive dhe arsye nga më të ndryshmet për të filluar biznesin tuaj. Disa nga arsyet më të zakonshme për fillimin e biznesit janë: Ju dëshironi të punoni për vetveten.  Të qenit i vetëpunësuar ose bos i vetvetes është një faktor i një rëndësie të veçantë për njeriun.  Te personat  kreativ  mbikëqyrja nga të tjerët shkakton një lloj pakënaqësie sepse personat e tillë vlerësojnë vetveten dhe aftësitë e tyre dhe e konsiderojnë nënçmuese marrjen e urdhrave nga të tjerët e posaçërisht nga ata të cilët i konsiderojnë më të ngathët se veten e tyre.   Ju dëshironi pavarësi financiare. Të ardhurat personale fikse për shumë persona shkaktojnë mungesë motivi e në disa raste humbje të plotë të motivit për të punuar. Për këtë arsye është shumë e natyrshme që këta persona orientohen në punë të cilat u mundësojnë pavarësi të plotë financiare. Fundja, nuk është edhe shumë e rëndësishme nëse ata do të fitojnë më shumë ose më pak sesa do të fitonin sikur të punonin për dikë tjetër. Vetë paqartësia për këtë fakt paraqet sfidë të veçantë për personat në fjalë.   Ju dëshironi liri kreative. Normalisht njeriu nuk është në gjendje kreativiteti tërë kohën, sepse një gjendje e tillë tek njeriu paraqitet vetvetiu kur të ekzistojnë rrethana që e mundësojnë kreativitetin. Të punuarit për dikë tjetër nuk i jep njeriut kohë të mjaftuar që të arrijë gjendjen kreative dhe e vështirëson arritjen e gjendjes së tillë. Detyrat e përditshme rutinë vetëm sa e vështirësojnë kreativitetin. Njeriu është më kreativ kur punon për veten, sepse mbi të nuk rëndon detyrimi siç është rasti kur punon për dikë tjetër. Personi i tillë “punon” edhe jashtë orarit të punës sepse njeriu i tillë i cakton vetes edhe orarin e punës dhe e ka në interes që të punoj gjatë tërë orarit pra 24 orë. Ju dëshironi që plotësisht të shfrytëzoni aftësitë dhe njohurit tuaja. Njeriu shfrytëzon plotësisht dhe pa rezervë aftësitë dhe njohuritë e veta vetëm kur është duke punuar për vetveten dhe është normale se ai kursen veten sidomos kur është i pamotivuar në aspekte të ndryshme. Edhe vet lloji i biznesit për të cilin përcaktohet njeriu përkon me aftësitë dhe njohurit e tija, përderisa kjo nuk mund të pohohet gjithmonë kur punohet për dikë tjetër sepse i punësuari realizon paramendimet e punëdhënësit të cilat zakonisht nuk mund të kuptohen deri në esencë sepse janë të huajat.